Paketearen definizioa [Kursaal Auditorioa - Abonamendua] - Donostia Kultura

Jamie Cullum

Jamie Cullum mundu osoan goraipatutako abeslari, konpositore eta multinstrumentista da, Jazz, pop eta rock estiloak uztartzen dituen modu paregabeagatik ezaguna. Agertokian erakutsitako dinamismoagatik eta talentu miresgarriagatik nabarmendua, Cullum Twentysomething (2003) diskoarekin egin zen ospetsua; Erresuma Batuko garai guztietako disko salduenetako bat izan zen.

Estudioko bederatzi disko kaleratuta, 10 milioi disko baino gehiago salduta eta 900 milioi streaming entzunaldi inguru lortuta, Cullumek egin duen ibilbide arrakastatsuari beste fazeta bat gehitu behar zaio: irrati-aurkezle saritua eta kontsolidatua da, eta BBC Radio 2n astero egiten duen programarekin milioi bat entzule baino gehiago ditu. Hamalau urtez eman dituen 750 saio baino gehiagotan, Jamiek artista handiak elkarrizketatu ditu, tartean Paul McCartney, Billy Joel, Paul Simon, Norah Jones eta Lars Ulrich, eta talentu berriak ezagutzera eman eta aurkeztu ditu, esaterako Laura Mvula, Gregory Porter, Ezra Collective eta Laufey.

The Beach Boys: endless summer gold tour

Mike Love (ahotsa), Bruce Johnston (teklatuak, baxua), Brian Eichenberger (musika zuzendaria), Christian Love, Tim Bonhomme, Jon Bolton, Keith Hubacher, Randy Leago, John Wedemeye

Sei hamarkada baino gehiagotan zehar, Beach Boys funtsezko taldea izan da herri musikaren historian. Beren abestiek Kaliforniako bizi-estiloa irudikatu dute, eta maitasuna, gazteen gogoberotasuna eta surfaren kultura esperimentatzeko pasaportea izan dira. Uda, hondartzak, surfa eta gazteria alai eta tolesgabea nagusi diren mundu idilikoa islatzen duten abesti horiek, beren harmonia bikainekin, eta moldaketa musikal sofistikatu eta berritzaileekin, mezu sinple eta positiboak transmititu eta himno bihurtu ziren. Beach Boys taldea 1961ean eratu zen Hawthornen (Kalifornia), eta hasiera batean Brian, Carl eta Dennis Wilson hiru anaia nerabeak, haien lehengusu Mike Love eta eskolako lagun Al Jardine zituen kide. 1962ko uztailean taldeak lehen albuma atera zuen, Surfin’ Safari, eta horrela eman zioten hasiera garai guztietako talde arrakastatsuenetako baten historiari.

Yerai Cortés (gitarra), María Reyes, Triana Maciel, Nerea Domínguez, Elena Ollero, Salomé Ramírez, Macarena Campos (palmak eta koruak)

Yerai Cortés (Alacant, 1995) flamenkoa lurralde ezezagun eta ernagarrietara eramaten ari diren artisten belaunaldi berri horretakoa da. Gaztea izan arren, ibilbide luzea egina du dagoeneko hainbat generotako artistekin kolaboratzen: flamenkoaren berritzaile eta urratzaileetatik hasita (Rocío Molina eta Niño de Elche) latitude desberdinetako musikarietara (Judeline, Ralphie Choo, Lola Índigo eta C. Tangana besteak beste); azken honi Sin cantar ni afinar bere biran lagundu dio. Yerai Cortés, bestetik, protagonista da La guitarra flamenca de Yerai Cortés filmean; Antón Álvarezen (C. Tangana izenez ezagunagoa bere fazeta musikalean) opera prima honek aipamen berezia lortu du 72. Donostia Zinemaldiko Zuzendari Berriak sailean.

Hermeto Pascoal & Grupo

Hermeto Pascoal (teklatuak, akordeoia, te-ontzia, flauta baxua, body percussion, ur-katilua…), Itiberê Zwarg (baxu elektrikoa, perkusioa), André Marques (pianoa, flauta, perkusioa), Jota P. (saxoak, flautak), Fábio Pascoal (perkusioa, zuzendaritza), Ajurinã Zwarg (bateria, perkusioa)

Hermeto Pascoal konpositore eta multinstrumentista brasildar nabarmenaren musika lirikoa eta erromantikoa da batzuetan, eta zalapartatsua beste batzuetan; musika folklorikotik hasi eta musika futuristaraino doa, xumea eta barea izatetik zurrunbilotsua eta harrigarria izateraino. Bere seikoteak, 40 urte baino gehiagoz lagun izan duenak, instrumentu konbentzionalak erabiltzen ditu, besteak beste flautak, saxofoiak, teklatuak, baxuak, sintetizadoreak... baina baita asmatutako beste asko ere, esaterako kubo-estalkiak, te-ontziak, goporrak harriekin, ur-katiluak...

Andrew Bird

Andrew Bird (ahotsa, bibolina), Ted Poor (bateria), Alan Hampton (baxua)

Andrew Bird, abeslari, konpositore eta multinstrumentista estatubatuarra, ezaguna da biolinean erakusten duen maisutasunagatik, bere txistu-hotsagatik, eta folka, Jazza,indiea eta musika klasikoa bezalako generoak uztartzeko duen gaitasunagatik. Bere abestiek letra poetikoak eta moldaketa berritzaileak izan ohi dituzte. Bere musikak sofistikazio teknikoa eta Ipar Amerikako eta Europako tradizio folklorikoa konbinatzen ditu. Hala, sentsibilitate handia transmititzen duten disko erakargarriak dira bereak, erraz entzutekoak.

60. Jazzaldian Birdek bere azken diskoa aurkeztuko du, Sunday Morning Put-On(2024): aurretik egin duen beste edozein lanetik aldentzen den hau bidaia bat da denboran zehar, bizitza osoan maitatu duen musikara itzultzeko, XX. mendeko 30eko eta 40ko hamarkadetako Jazzera eta klasiko eta estandarren kantutegi iparramerikarrera. Atal erritmiko magistral batek lagunduta, Ted Poor baterian eta Alan Hampton baxuan, Birdek bere egin eta sakon eraldatzen ditu bere musikan eragin sakona izan duten musikari gailenen pieza bikainak, tartean hauenak: Cole Porter, Duke Ellington, Lerner & Loewe, Richard Rodgers & Lorenz Hart... Bere hitzetan: “XX. mendearen erdialdera arteko Jazzaren garai jakin batekiko nire maitasuna etengabea izan da, nahiz eta nire lanak aldaketa asko izan, eta gehiena ez da Jazza. Bere liluraren pean egon nintzen garai hartatik zerbait urrundu nintzen, eta berriro murgildu nahi izan nuen.”

Oscar Peterson Centennial Concert

John Clayton (kontrabaxua), Jeff Hamilton (bateria), Sullivan Fortner (pianoa)

2025ean, 100 urte beteko dira Oscar Emmanuel Peterson, jatorri kanadarra eta arbaso antillarrak zituen pianista eta konpositorea, jaio zenetik. 60 urte baino gehiagoz Jazz musikari garrantzitsuenetako bat izan zen. Peterson, 1975eko Jazzaldian aritu zena, 82 urte zituela hil zen 2007an, berdinik ez duen ondarea utzita, Jazza bezain betierekoa.

Ohore eta sari ugari jasotakoa (8 GRAMMY® sari, bere ibilbide osoari emandakoa barne), Peterson -Duke Ellingtonek “teklatuaren maharaja” goitizena jarri zion- Jazzaren historiako pianista onenetakoa da. Gainera, garai guztietako pianista emankorrenetakoa da, 500 grabazio baino gehiago egin eta 200 disko baino gehiago izenpetu baitzituen, bere talentuaren erakusgarri guztiak.